公司要「請啱人」而非「請到人」

「請啱人」就好比喻成多咗個神隊友咁，態度正面主動，好多嘢佢都識自動波，你有個任務 brief 佢 1,2,3，佢會諗方法處理4,5,6，再本事嘅完成7,8,9,10 (咁高質嘅，當然好講彩數啦！)。

相反，唔好彩遇上豬隊友，就要你踢一踢郁”半”郁 (你無睇錯，係半郁)，蛇王 / 重複犯錯 / 效率慢又hea / 冇交帶 / 冇團隊精神，梗中一瓣。要管理呢類人嘅人力成本將大大提升，成條 team 士氣仲分分鐘被拖低，所以做老闆真係唔好諗住「請到人」就算。

切忌有殺錯冇放過！除注意求職者能力外，都要靠自己嘅經驗觀察，避免誤招講就天下無敵，做就無能為力嘅！呢類人好多時都有共通點，面對你啲問題時都會話「得得得」，其實佢只係想你快啲決定請佢。亦有啲情況係，求職者真係身懷上乘武功，之但係公司只會留得住佢個人，而留唔住佢個心，佢只願意投放１成功力比公司工作。相反，有啲基礎能力值一般，但工作態度真係好好嘅同事，可能會更值得公司重點栽培。人品及工作態度難改，而技術及知識係可以用時間磨練得來的。

人工薪酬當然係第一關建，因此雇主/HR 在面試時有必要清晰而且肯定地交代。亦要清楚講解職權、工作崗位、負責事項，以免就職時新同事覺得不被公司尊重或被冷落，而變成迷途小羔羊。盡可能分享公司文化及員工守則，正所謂「你揀人，人揀你」，如果雙方觀點理念差異太大，真係會免強冇幸福！同時建議多問問應徵者工作以外嘅嗜好，以及以前離職嘅原因，加深了解對方性格同脾性。在最後做決定前，甚至可聯絡佢上一任老闆給予評價作為參考。

人才係一間公司推進嘅重要因素之一，「請啱人」能讓公司賺錢，反之卻會令公司蝕錢！如果遇到有潛力嘅成員時，老闆出手要爽快，但萬一請錯人時，老闆落手就要果斷，這就是「商」場。